Ministrja Çitaku priti Ambasadorin e Gjermanisë në Kosovë z. Blomeyer

Prishtinë 2 nëntor, 2012 – Ministrja e Integrimit Evropian e Republikës së Kosovës, Vlora Çitaku priti në takim njohës Ambasadorin e posaemëruar të Republikës Federale të Gjermanisë në Kosovë, z. Peter Blomeyer.

Me Ambasadorin Blomeyer, Ministrja Çitaku ka diskutuar për zhvillimet në Kosovë si dhe avansimin në agjendën e integrimit Evropian të Kosovës.

Ministrja Çitaku, ka shprehur mirënjohjen në emër të qytetarëve dhe Qeverisë së Republikës së Kosovës për përkrahjen e madhe që Gjermania ka dhënë dhe vazhdon të japë për një zhvillim demokratik të Kosovës, poashtu edhe në procesin e integrimit Evropian të vendit tonë. Ministrja po ashtu ka siguruar Ambasadorin Gjerman se procesi i normalizimit të marrëdhënieve ndërmjet shtetit të Kosovës dhe Serbisë, por edhe të gjithë rajonit do të vazhdojë për të mirën e të gjithë qytetarëve dhe zhvillimit të rajonit në tërësi.

Gjithashtu, Ministrja tha se “për Kosovën, Gjermania ka qenë një ndër mbështetësit kryesorë në rrugëtimin tonë të gjatë drejt lirisë, pavarësisë, dhe tani është mbështetësi kryesorë në rrugëtimin tonë pashtu të gjatë drejt integrimit Evropian. Njëkohësisht,  u pajtuam me Ambasadorin që agjenda Evropiane nuk ka alternative; integrimi Evropian i Kosovës dhe rajonit nuk ka alternativë, mirëpo ky proces do të kërkoj shumë reforma, procese të brendshme transorfmimi ku shumë prej të cilave nuk do të jenë të lehta, dhe as popullore”, vazhdoi për të thënë Ministrja Çitaku.

Nga ana e tijë Ambasadori Gjerman, z. Blomeyer, ka vlerësuar progresin që po arrihet në Kosovë duke rikonfirmuar përkrahjen e mëtutjeshme të Gjermanisë për shtetin e Kosovës. Ambasadori Blomeyer tha se ”Dua të ju siguroj që Qeveria e Gjermanisë e përkrah dialogun e Kosovës me Serbinë,  dhe ju bënë thirrje spektrit politik në kosovë edhe qytetarëve të Kosovës që të përkrahin dialogun të cilin ne e shohim si alternativë të vetme.” Ambasadori po ashtu vazhdoi për të thënë se “Kosova ka zgjedhur si destinacion Evropën gjë të cilën edhe ne po e dëshirojmë për Ballkanin, dhe jeni shumë të mirëseardhur, dhe se është rrugë e gjatë dhe e vështirë por që edhe vendet tjera kanë kaluar nëpër të”.

Ambasadori Blomeyer ishte mirënjohës Ministres Çitaku dhe gjithë popullit të Kosovës për pritjen që i kanë bërë me arritjen e tijë dy javë më parë.