Diskutohen reformat në fushën e tregut të brendshëm dhe konkurrencës

Prishtinë, 23 prill 2013 – Nën organizimin e Ministrisë së Integrimit Evropian (MIE) dhe Ministrisë së Tregtisë dhe Industrisë (MTI) u mbajt takimi i Komisionit Ekzekutiv për Integrim Evropian në fushën e tregut të brendshëm, konkurrencës, mbrojtjes së konsumatorit dhe shëndetit.

Takimi u organizua si veprim pasues i takimit të Dialogut të Procesit të Stabilizim Asociimit, të mbajtur me 16 prill, me Komisionin Evropian për të shqyrtuar hapat e radhës drejt adresimit të sfidave kyçe të sektorëve.

Në fushën e tregut të brendshëm, institucionet u dakorduan për hapat e radhës drejt miratimit të akteve nënligjore të Ligjit për  Inspektoratin e Tregut, Mbikëqyrjen e Tregut dhe Ligjit të  Sigurisë së Përgjithshme të Produkteve. Po ashtu, MTI do të finalizojë së shpejti autorizimin e trupit inspektues për lifta dhe komponentët e tyre të sigurisë.

Me qëllim të liberalizimit të tregut dhe sigurimit të lëvizjes së lirë të shërbimeve, Ministria e Tregtisë dhe Industrisë do të filloj që të harmonizojë legjislacionin kombëtar me Direktivën 2006/123/EC mbi shërbimet në tregun e brendshëm.

Sa i përket prokurimit publik, së shpejti pritet miratimi i listës së centralizuar të prokurimeve të përbashkëta dhe emërimi i Drejtorit të Agjencisë Qendrore të Prokurimit.

Në fushën e pronësisë intelektuale, deri në mesin e këtij viti, do të finalizohet Ligji për Indikatorët Gjeografik dhe Emërtimet dhe Udhëzimi Administrativ për përfaqësimin në fushën e të drejtave të pronësisë industriale.

Me qëllim të qasjes së më të lehtë të publikut, deri në fund të këtij viti do të funksionalizohet portali/baza e të dhënave për patenta.

Krijimi i kushteve të drejta për konkurrencë është bazë për funksionimin efektiv të tregut. Në këtë drejtim, me qëllim të konsolidimit të bazë ligjore, deri në fund të këtij viti do të miratohet plotësim ndryshimi i Ligjit për Konkurrencën. Po ashtu, Autoriteti i Konkurrencës do të fuqizojë edhe më tutje kapacitete njerëzore në fushën e ndihmës shtetërore përmes rekrutimit të pesë zyrtarëve.

Pjesëmarrësit u dakorduan se është esenciale që sa më shpejt të funksionalizohet Zyra dhe Komisioni për Ndihmë Shtetërore.

Informatë e përgjithshme:

Komisionet Ekzekutive janë trupa ndërqeveritarë që shërbejnë si forumet e ekspertëve për të siguruar koordinim ndërinstitucional në kuadër të reformave të parapara me agjendën evropiane.

Janë gjithsejtë shtatë Komisione Ekzekutive:

– Drejtësia, Liria dhe Siguria;
– Inovacioni, Shoqëria Informative, Politikat Sociale, Arsimi dhe Kultura;
– Tregtia, Industria, Dogana dhe Tatimi;
– Tregu i brendshëm, Konkurrenca, Mbrojta e Konsumatorit dhe Shëndetit;
– Bujqësia, Peshkataria, Pylltaria, Siguria e Ushqimit;
– Transporti, Mjedisi, Zhvillimi Rajonal;
– Çështjet Ekonomike dhe Financiare, Statistikat.

Komisionet Ekzekutive për punën e tyre raportojnë Komiteti Punues për Integrim Evropian.

 

Last modified: 16 Gusht, 2022