Ministrja Çitaku priti Kreun e Divizionit për Ballkanin Perëndimor në Ministrinë Gjermane të Punëve të Jashtme

Prishtinë 8 nëntor, 2012 – Ministrja e Integrimit Evropian e Republikës së Kosovës, Vlora Çitaku priti në takim ish Ambasadorin e Gjermanisë në Kosovë z. Ernst Reichel, tani  në pozitën e Kreut të Divizionit për Ballkanin Perëndimor në Ministrinë Gjermane të Punëve të Jashtme, i shoqëruar nga Ambasadori i posaemëruar i Republikës Federale të Gjermanisë në Kosovë, z. Peter Blomeyer.

Me z. Reichel Ministrja Çitaku ka diskutuar për zhvillimet më të fundit në Kosovë si dhe avansimin në agjendën e integrimit Evropian të Kosovës. Ministrja Çitaku rikonfirmoi z. Reichel përkushtimin e Qeverisë së Kosovës për arritjen e standardeve Evropiane dhe pltësimin e kritereve për liberalizim të vizave dhe proceseve tjera të integrimit Evropian.

Ndërsa nga ana e tij z. Reichel ka falënderuar Ministren Çitaku për pritjen si dhe ka përsëritur që Gjermania do të vazhdojë të e përkrahë Kosovën në të gjitha proceset. Z. Reichel ka ofruar mbështetjen e tij por edhe të Qeverisë Gjermane për Kosovën, duke vlerësuar lartë përkushtimin që ka Gjermania në mënyrë që Kosova suksesshëm të ecën përpara drejt integrimit Evropian dhe se Gjermania dëshiron që Kosova të jetë një shembull i suksesit si shtet funksional dhe demokratik.