Prishtinë, 10 mars. 2015 – Në takimet tona të frytshme sot, ne u fokusuam në hapat e Kosovës për të adresuar valën e fundit të migrimit për në Bashkimin Evropian sikurse edhe për aspektet e ndryshme të ndërlidhura me implementimin e kritereve të udhërrëfyesit për liberalizimin e vizave.
Diskutimet tona u fokusuan në mënyrë specifike në ashpërsimin e kritereve për licencimin e kompanive të udhëtimit që transportojnë udhëtarë në BE, informimin e publikut për të drejtat dhe obligimet që burojnë nga hyrja në zonën e Shengenit, përmirësimin e kontrolleve kufitare dhe sigurimin e kthimit dhe reintegrimit të suksesshëm në shoqëri të migrantëve të parregulltë në Bashkimin Evropian. Ne gjithashtu diskutuam mënyrat për përmirësimin e bashkëpunimit operacional dhe shkëmbimit të informimit me autoritetet serbe, hungareze, austriake, gjermane si dhe me Frontex-in. Ne gjithashtu diskutuam më përgjithësisht për gjendjen lidhur me implementimin e kërkesave për udhërrëfyesin për liberalizimin e vizave për Kosovën.
Komisioni Evropian po pret një raport nga institucionet e Kosovës që paraqet implementimin e rekomandimeve të nënvizuara në raportin e dytë vlerësues të Komisionit për udhërrëfyesin për liberalizimin e vizave për Kosovën. Takimet tona sot janë pjesë e një dialogu më të gjerë e të vazhdueshëm në nivele teknike dhe politike për të vlerësuar punën që duhet bërë në këtë drejtim – dhe mezi po presim të vazhdojmë këtë bashkë punim konstruktiv.
Last modified: 12 Gusht, 2022
