Qeveria e Republikës së Kosovës mirëpret vendimin e Këshillit Evropian për nisjen e negociatave për (MSA)

Prishtinë, 28 Qershor 2013 – Qeveria e Republikës së Kosovës mirëpret vendimin e sotëm të Këshillit Evropian për nisjen e negociatave për Marrëveshjen Stabilizim Asociimi (MSA) ndërmjet Republikës së Kosovës dhe Bashkimit Evropian.

Vendimi i sotëm paraqet hapin e parë zyrtarë drejt rrugëtimit tonë për anëtarësim në Bashkimin Evropian.

MSA-ja është marrëveshja e parë kontraktuale ndërmjet Republikës së Kosovës dhe Bashkimit Evropian që ofron perspektivë të qartë drejt anëtarësimit të plotë të Kosovës në BE, po ashtu është forma më e avancuar e asociimit që një vend kandidat potencial mund të këtë me Bashkimin Evropian.

Marrëveshja ofron një kornizë strategjike për zhvillim të përgjithshëm shoqëror politik dhe ekonomik të vendit aspirues për anëtarësim në BE. Poashtu, kjo marrëveshje paraqet kornizë ligjore që ofron stabilitet dhe siguri për investitorët, dhe si e tillë krijon bazë të shëndoshë për investime të huaja direkte dhe gjenerimin e vendeve të punës.

Nisja e negociatave ndërmjet Republikës së Kosovës dhe Bashkimit Evropian përfundimisht ankoron procesin integrues të Kosovës dhe po ashtu konsolidon edhe më tutje pozitën juridike ndërkombëtarë të shtetit tonë.

MSA-ja paraqet një hap më afër arritjes së statusit të vendit kandidat, i cili do të mundëson kornizë më të gjerë për përfitime nga asistenca financiare e BE-së.

Vendimi i sotëm për hapjen e negociatave për MSA është meritë e të gjitha institucioneve të Republikës së Kosovës dhe tërë spektrit politik, njëherit kjo konfirmon progresin e arritur në ndërmarrjen e reformave politike, ekonomike dhe juridike në Republikën e Kosovës.

“Neser, ne ora 12:00, Ministrja per Integrim Evropian, znj. Vlora Citaku, do te mban konferencen per medie lidhur me vendimin e sotem te Keshillit Evropian per nisjen e negociatave per MSA.”

Last modified: 16 Gusht, 2022