Kuvendi i Republikës së Kosovës, ratifikon Marrëveshjen e Stabilizim Asociimit

Prishtinë, 2 nëntor 2015 – Kuvendi i Republikës së Kosovës, ka ratifikuar sot me 86 vota për, Marrëveshjen ndërkombëtare për Stabilizim Asociim (MSA), mes Republikës së Kosovës dhe Bashkimit Evropian.

Ministri i Integrimit Evropian, z. Bekim Çollaku derisa ka propozuar për miratim Projektligjin për ratifikimin e MSA-së, para deputetëve të Kuvendit të Kosovës, ka vlerësuar se MSA-ja paraqet hapin e parë dhe më të rëndësishëm të ndërmarrur deri më tani në rrugëtimin e Republikës së Kosovës drejt anëtarësimit në Bashkimin Evropian.

“Pa dashur të ekzagjeroj, rëndësia e kësaj marrëveshjeje për orientimin strategjik, politik dhe ekomomik të vendit është jetike. Kosova tani është e gatshme për të marrë përsipër detyrimet dhe të bëjë reformat e nevojshme për të përmbushur kriteret e anëtarësimit në BE. Pa dyshim, si rezultat i kësaj marrëveshjeje, fati i Kosovës dhe i BE-së do të jetë i lidhur më ngushtë – dhe besoj fuqishëm se kjo është një e arritur e madhe, e drejtë dhe plotësisht në përputhje me interesin tonë shtetëror për integrime euro-atlantike”, ka thënë ministri Çollaku.

Ministri Çollaku, ka potencuar se MSA-ja,  do të sjellë një motiv dhe shtyrje dhe obligim të ri për t’i zbatuar reformat që aq shumë i duhen vendit tonë: duke filluar me përforcimin e mëtejmë të sundimit të ligjit, luftimin e krimit të organizuar dhe korrupsionit, deri tek reformat ekonomike, me qëllim të rritjes së vendeve të punës dhe rritjen e këmbimit tregtar me BE, duke e rritur eksportin e prodhimeve kosovare.

“Të gjitha këto do ta bëjnë Kosovën më të zhvilluar dhe të gatshme t\’iu bashkuar familjes evropiane”, ka vlerësuar ministri, duke shpjeguar se kjo marrëveshje është e ngjashme me ato të vendeve të rajonit që gëzojnë një perspektivë anëtarësimi në BE.

Më tej ministri i Integrimit Evropian, ka bërë një përmbledhje para deputetëve për rëndësinë politike, ligjore dhe ekonomike të Marrëveshjes së Stabilizim Asociimit.

Nga këndvështrimi politik, ka thënë se MSA-ja ka avancuar marrëdhëniet tona me BE-në nga një marrëdhënie deklarative politike dhe e vullnetit të mirë, në marrëdhënie kontraktuale me të drejta dhe obligime për të dyja palët nënshkruese.

Nga këndvështrimi ligjor, MSA-ja ka pohuar se ka bazë të njëjtë ligjore sikur të gjitha MSA-të e vendeve të rajonit. “MSA-ja është negociuar në bazë të nenit 218 të Traktatit të Funksionimit të Bashkimit Evropian. Kjo bazë ligjore përcakton se Bashkimi Evropian mund të lidh marrëveshje ndërkombëtare me shtete te treta. MSA formalizon dialogun tonë institucional me Bashkimit Evropian përmes krijimit të mekanizmave institucional. Republika e Kosovës ka marr përsipër të përafrojë legjislacionin ekzistues dhe legjislacionin e ardhshëm në mënyrë graduale me tërë legjislacionin e BE-së”, ka shpjeguar ministri Çollaku.

Nga këndvështrimi ekonomik,  ka theksuar se MSA-ja do të këtë një varg të efekteve pozitive.

Ministri Çollaku ka nënvizuar se MSA-ja synon krijimin e zonës së tregtisë së lirë ndërmjet Kosovës dhe BE-së brenda 10 vite.

“Nga hyrja në fuqi e MSA-së, do të mundësohet nga një anë qasja e plotë e produkteve të Kosovës në BE dhe nga ana tjetër, liberalizimi gradual i tregut të Kosovës për produktet e BE-së. Liberalizimi i tregut ndërmjet Kosovës dhe BE-së do të ndikoj drejtpërdrejt në rritjen e konkurrueshmërisë së ekonomisë tonë që do të ofron shërbimet më kualitative, produkte më të mira dhe çmime më të lira për qytetarët. MSA do të ofroj më shumë stabilitet dhe parashikueshmëri për investitorët dhe rrjedhimisht do të kontribuon në rritjen e investimeve të huaja direkte. Në tërësi, MSA do të ndikon në ristrukturimin e ekonomisë tonë, rritjen ekonomike dhe zvogëlimin e papunësisë”, ka thënë ndër të tjera ministri Çollaku.

Ministri Çollaku po ashtu shprehi falënderim për të gjithë deputetët e Kuvendit të Kosovës që e miratuan Marrëveshjen e Stabilizim Asociimit.

Last modified: 11 Gusht, 2022