Republika e Kosovës ka dorëzuar ditën e sotme në Pragë aplikimin për anëtarësim në Bashkimin Evropian. Aplikimi i është dorëzuar Presidencës Çeke të Këshillit të BE-së. Kryeministri i Republikës së Kosovës, Albin Kurti, pas takimit me ministrin e Jashtëm të Çekisë, Jan Lipavsky, ka zhvilluar një takim me ministrin për Çështje Evropiane, Mikulas Bek, të cilit dhe formalisht i ka dorëzuar aplikimin e nënshkruar nga Kryeministri Albin Kurti, Kryetari i Kuvendit Glauk Konjufca dhe Presidentja Vjosa Osmani.
Pas dorëzimit, pati dhe konferencë të përbashkët për media. Më poshtë, fjala e plotë e Kryeministrit Kurti:
I nderuar Ministër Bek,
Zonja dhe zoterinj,
Ne kemi ardhur në Pragë, në qytetin në zemër të Evropës, për të rikonfirmuar përkushtimin e palëkundur të Republikës së Kosovës ndaj vlerave themelore të Bashkimit Evropian – për lirinë, demokracinë, të drejtat e njeriut, barazinë dhe sundimin e ligjit – duke dorëzuar aplikimin e Republikës së Kosovës për anëtarësim në atë Bashkim.
Kjo është një ditë historike për popullin e Kosovës dhe një ditë e madhe për demokraci në Evropë.
Letra që mbaj në vete përmban shpresat dhe ëndrrat e qytetarëve tanë, të cilët kanë punuar kaq shumë për të arritur këtë ditë.
Ajo flet për aspiratat tona për t’iu bashkuar BE-së – me të cilën ndajmë vlera dhe ideale të përbashkëta – si një proces historik nga një projekt politik paqeje dhe prosperiteti.
I përgjigjet një vizioni të një Evrope që është e tërë, e lirë dhe në paqe. Ajo shton besimin në një Evropë që ka një të ardhme të ndritshme, bashkëpunuese dhe progresive.
Vitin e ardhshëm do të shënojmë njëzetvjetorin e Samitit të Selanikut, ku BE-ja u bëri një premtim të gjitha vendeve të Ballkanit Perëndimor. Vitin e ardhshëm do të festojmë 30 vjet që kur një Komunitet u bë zyrtarisht një Bashkim, një Bashkim Evropian, me hyrjen në fuqi të Traktatit të Mastrihtit. Viti i ardhshëm, në kuptimin evropian, fillon sot për vendin tim, duke i dorëzuar Shkëlqesisë Suaj aplikimin tonë për anëtarësim në Bashkim.
Ne e kuptojmë se rruga jonë përpara bazohet në meritat tona.
Ne nuk duam asnjë derë të pasme, as rrugë të shkurtër. Ne duam ta ndërtojmë BE-në në vendin tonë me njerëzit tanë – një BE e rritur në shtëpi, por jo e krijuar vetë: ne kemi nevojë për ndihmën e BE-së në Kosovë, një vend që përpiqet, që pastaj, të kontribuojë në BE.
Ne nuk e shohim progresin nga një këndvështrim transaksional, por nga një këndvështrim transformues, ku ne avancojmë demokracinë tonë, rritim ekonominë tonë dhe reformojmë shoqërinë tonë. Bashkimi Evropian është destinacioni që synojmë dhe është fati që ne përqafojmë.
Ndërkohë, BE-ja përfaqëson punën e vështirë që duhet të gëzohet. Që nga momenti kur dorëzuan aplikimet e tyre përkatëse, deri në momentin e anëtarësimit, nevojiteshin periudha të ndryshme kohore për vende të ndryshme: nga Finlanda dhe Suedia, që zgjatën tre vjet, në Maltë dhe Qipro, të cilave iu deshën 14 vjet – mesatarisht 9 vjet. Është realiste që Republika e Kosovës ta synojë këtë kohëzgjatje mesatare. Marrëveshja jonë e Stabilizim Asociimit tashmë është zbatuar me rreth 50%.
Faleminderit, Ministër Bek, për pritjen e ngrohtë dhe për gjithë mbështetjen që na keni treguar gjatë presidencës suaj.
Nën udhëheqjen e Republikës Çeke të BE-së, populli ynë është afruar më shumë me Bashkimin Evropian; dhe lidhja ndërmjet Republikës Çeke dhe Republikës së Kosovës është forcuar edhe më shumë.
Më lejoni ta mbyll duke thënë se “Evropa si detyrë” e Presidentit Vaclav Havel është Evropa jonë, është detyra jonë.
Ju faleminderit shumë.
Last modified: 16 Dhjetor, 2022
