Gjermania përkrahë Kosovën në agjenden e saj evropiane

Prishtinë, 29 janar 2014 – Zëvendës Ministri i Integrimit Evropian, Gëzim Kasapolli priti në takim Z. Hans Ulrich Südbeck, shef i Divizionit për Ballkanin Perëndimor në Zyrën Federale Gjermane, i shoqëruar nga Ambasadori Gjerman në Kosovë Peter Blomeyer.

Me këtë rast u diskutua për marrëdhëniet ndërmjet dy vendeve tona, zgjerimin e bashkëpunimit reciprok dhe koordinim të shtuar për çështjet më të rëndësishme për vendim tonë, si agjendën evropiane dhe subjektivitetin ndërkombëtar të Kosovës.

Zëvendës Ministri z. Kasapolli potencoi rëndësinë e përkushtimit dhe qasjes aktive të Qeverisë Gjermane ndaj avancimit të tërë rajonit, dhe posaçërisht Kosovës, në agjendën evropiane për të qenë pjesë e familjes së madhe.

Zëvendës Ministri z. Kasapolli po ashtu kërkoi intensifikimin e bashkëpunimit ndërmjet Kosovës dhe Gjermanisë, në mënyrë që të realizohen interesat tona të dyanshme, por edhe t’i kontribuohet avancimit të rajonit në përgjithësi.

Ndër të tjera, Zëvendës Ministri z. Kasapolli tha se: Republika e Kosovës integrimin e evropian e kupton si proces të reformave të brendshme, si nga aspekti institucional po ashtu edhe atë shoqëror.

Diskutimet gjithashtu u fokusuan edhe në marrëveshjen e Stabilizim Asociimit ndërmjet Kosovës dhe BE-së, çështjes së liberalizmit të vizave dhe dialogut mes Kosovës dhe Serbisë

Nga ana e tij z. Südbeck ndër të tjera tha: Kosova duhet të vazhdoj me reformat, sepse këto reforma e kanë afruar Kosovën shumë afër BE-së, po ashtu potencoi rëndësinë e dialogut Kosovë-Serbi, i cili ka prodhuar stabilitet, dhe kooperim rajonal më të mirë për të gjitha palët.