Diskutohet Instrumenti i Para-anëtarësimit (IPA) 2014-2020

Budva, Mali i Zi, 21 tetor 2013 – Sot në Mal të Zi, nën organizimin e Zyrës së Koordinatorit Kombëtar për IPA (NIPAC), në kuadër të Ministrisë për Punët e Jashtme dhe Integrimin Evropian të Malit të Zi, u mbajt punëtoria me përfaqësues nga vendet e rajonit, me qëllim të shkëmbimit të informatave dhe përvojës sa i përket Instrumentit të ri të Para-anëtarësimit, IPA 2, për periudhën e ardhshme 2014-2020.

Në takim morën pjesë delegacionet nga zyrat e NIPAC-ut nga vendet e rajonit. Kosova u përfaqësua në këtë takim nga Sekretari i Përgjithshëm i MIE-së, në cilësinë e NIPAC-ut. Gjatë takimit u diskutua rreth mësimeve të nxjerra gjatë përvojës me IPA për periudhën 2007-2013, përvojës së vendeve përfituese me planifikimin për prioritetet vendore, hartimin e Dokumentit Strategjik Kombëtar, dhe po ashtu, u shfrytëzua si mundësi për krijimin e kontakteve në mes përfaqësuesve nga vendet e rajonit.

Gjatë takimit, Sekretari Shasha ka qenë folës lidhur me përvojën e Kosovës në kuadër të përgatitjes së Dokumentit Strategjik Kombëtar të IPA-s. Gjatë prezantimit, z. Shasha nënvizoi rëndësinë e lidhjes dhe harmonizimit në mes asistencës së dhënë nëpërmjet IPA-s dhe prioriteteve që dalin nga procesi i stabilizim-asociimit. Po ashtu, z. Shasha prezantoj procesin e përgatitjes së kontributit të Kosovës në kuadër të përgatitjes së Dokumentit Strategjik Kombëtar të IPA-s. Në këtë drejtim, z. Shasha prezantoj edhe prioritetet e Kosovës për periudhën 2014-2020.

Last modified: 15 Gusht, 2022