Prishtinë, 25 mars 2016 – Ministri i Integrimit Evropian, z. Bekim Çollaku, është takuar sot me përfaqësues të institucioneve përgjegjëse për zbatimin e tetë rekomandimeve të fundit në kuadër të procesit të liberalizmit të vizave.
Duke vlerësuar punën e tyre të jashtëzakonshme në plotësim të këtyre kritereve, ministri i ka falënderuar për angazhimin lidhur me misionin e fundit vlerësues në këtë proces.
“Më lejoni të ju falënderoj për përkushtimin e demonstruar në zbatimin e 8 rekomandimeve të mbetura në procesin e liberalizimit të vizave dhe sidomos në angazhimet rreth organizimit të misionit vlerësues të cilin e kishim në Kosovë gjatë javës së kaluar. Prezantimet dhe informatat e ofruara nga ana e juaj gjatë takimeve të zhvilluara me ekspertët e shteteve anëtare të BE-së dhe Komisionit Evropian, ju kanë mundësuar këtyre të fundit të kenë një vlerësim gjithëpërfshirës dhe gjithsesi pozitiv”, ka theksuar ministri Çollaku.
Last modified: 10 Gusht, 2022
