Në Dublin të Irlandës, në Takimin Joformal të Ministrave për Çështje Evropiane, para fillimit të programit zyrtar, zhvillova një takim me znj. Milena Hrdinková, Këshilltare Kryesore Diplomatike për Çështje të BE-së e Kryeministrit dhe Sherpa për Këshillin Evropian e Republikës Çeke.
E falënderova znj. Hrdinková për mbështetjen e Republikës Çeke në rrugëtimin tonë drejt Bashkimit Evropian.
Ishte pikërisht gjatë Presidencës Çeke të Këshillit të BE-së, në dhjetor të vitit 2022, që Kryeministri Kurti dorëzoi në Pragë aplikimin e Kosovës për anëtarësim në Bashkimin Evropian.
Sot, mbështetja e Çekisë mbetet e rëndësishme për avancimin e këtij aplikimi dhe për hapat e ardhshëm të Kosovës drejt anëtarësimit në BE.
Gjatë takimit theksova rëndësinë e bashkëpunimit me shtetet anëtare, në mënyrë që mbështetja të kthehet në hapa konkretë drejt marrjes së statusit kandidat dhe hapjes së negociatave.
