Dialogu për Liberalizim të Vizave me BE: Ministrja Ҫitaku dhe Minsitri Rexhepi takohen me zyrtarë të lartë të Komisionit Evropian në Bruksel

Bruksel, 16 qershor 2014 – Sot u mbajt takimi i katërt i zyrtarëve të nivelit të lartë në kuadër të Dialogut për Liberalizim të Vizave mes Republikës së Kosovës dhe Komisionit Evropian. Delegacionin e Qeverisë së Kosovës në këtë takim e udhëheqi Minsitrja e Integrimit Evropian znj. Vlora Ҫitaku dhe Ministri i Punëve të Brendshme z. Bajram Rexhepi ndërsa Komisioni Evropian ishte i përfqësuar nga Drejtori i përgjithshëm për punë të brendshme, z. Matthias Ruete, Shefi i zyrës së BE-së në Kosovë Z. Samuel Zhbogar, Drejtori për Ballkan Perëndimor i Drejtoratit të Përgjithshëm për zgjerim, Z. Jean Eric Paquet dhe zyrtar tjerë të Komisionit Evropian.

Ky takim është pjesë e takimeve të rregullta në mes të Qeverisë së Republikës së Kosovës dhe Komisionit Evropian ku diskutohen të gjitha çështjet e ndërlidhura me përmbushjen e kritereve të udhërrëfyesit për Liberalizimin e Vizave.

Në takimin e sotëm Komisioni dha vlerësimet e veta të hershme në bazë të misioneve vlerësuese të ndërmarra më herët gjatë vitit, si dhe u dha një mundësi që delegacioni i Kosovës të jepë plotësime me të arriturat e fundit në përmbushjen e të gjitha blloqeve të udhërrëfyesit për Liberalizim të Vizave, përshirë riintegrimin e personave të riatdhesuar, luftën kundër krimit të organizuar dhe korrupsionit, bashkëpunimit ndërinstitucional në fushën e rendit dhe ligjit, krimeve ekonomike, bashkëpunimit ligjor, dhe të drejtave themelore.

Pas takimit, Ministrja e Integrimit Evropian, znj. Vlora Ҫitaku tha: “Sot kishim edhe një takim të mirë me Drejtorin e Përgjithshëm, z. Ruete, dhe zyrtarët tjerë të Komisionit Evropian, dhe u inkurajuam nga vlerësimet e tyre për të arriturat që Kosova ka bërë së fundmi në përmbushjen e obligimeve të procesit të liberalizimit të vizave. Është vlerësim i përbashkët se jemi në fazën përfundimtare të këtij dialogu. Është e rëndësishme që të vazhdojmë me performancën e lartë të institucioneve në nivel qendror dhe lokal që e drejta e udhtimit të lirë e qytetarëve të Republikës së Kosovës të jetësohet pa vonesa të mëtutjeshme”.    

Last modified: 12 Gusht, 2022